नेपाल कम्युनिष्ट पार्टी (संयुक्त)

कल्पना राणा

नेकपा संयुक्तबाट समानुपातिकतर्फ संविधानसभामा प्रतिनिधित्व गर्ने कल्पना राणा २०४८ को संसदीय निर्वाचनमा नेकपा प्रजातन्त्रवादी(हाल संयुक्त) का उम्मेदवार हुनुहुन्थ्यो। ५२ वर्षीया राणाले गोरखपुर विश्वविद्यालय (भारत) बाट समाजशास्त्रमा स्नातकोत्तर गर्नुभएको छ। समाजसेवामा उहाँको रुचि रहेको छ र उहाँका कविता तथा लेखहरु प्रकाशित हुँदै आएका छन्। समाजमा व्यक्त लैङ्गिक, जातीय, क्षेत्रीय एवं वर्गीय विभेद र उत्पीडनका कारण २०२८ साल देखि राजनीतिमा होमिएकी राणा हाल नेकपा संयुक्तकी केन्द्रीय कार्यसमिति सदस्य र वागमती अञ्चल इन्चार्ज हुनुहुन्छ। यस अघि उहाँले पार्टीको काठमाडौं जिल्ला अध्यक्ष, संगठन विभाग सदस्य र संयुक्त वममोर्चा (नेपाल) को केन्द्रीय सचिवको जिम्मेदारी वहन गरिसक्नुभएको छ।

दृढ इच्छाशक्तिका साथ आफूले निरन्तर गरेको संघर्ष, परिवार र शुभचिन्तकको सहयोग तथा पार्टीको राजनीतिले आफूलाई संविधानसभामा पुर्‍याएको मान्नुहुन्छ सभासद राणा। संविधान सभामा सबै किसिमको विभेदको अन्त्य गर्नुका साथै जातीय, क्षेत्रीय तथा धार्मिक सदभाव, सहिष्णुता एवं एकताको पक्षमा र समावेशी, समतामूलक राज्य निर्माणका निम्ति जोडदार आवाज उठाउने उहाँको अठोट छ। नयाँ संविधान चाँडोभन्दा चाँडो निर्माण गरिनुपर्ने र जनताका भावना सँग कसैले पनि खेलबाड गर्न नहुनेमा उहाँको विशेष जोड रहेको छ।