नेपाली कांग्रेस

राधेश्याम अधिकारी

झापा, पाँचगाछी निवासी जगत बहादुर ताजपुरिया नेपाली कांग्रेसको कोटामा मनोनीत सभासद हुनुहुन्छ। ६४ वर्षीय सभासद ताजपुरिया २०१७ सालदेखि राजनीतिमा सक्रिय रहँदै आउनुभएको छ। शुरुदेखि नै नेपाली कांग्रेसमा आबद्ध रही आएका ताजपुरिया हाल नेपाली कांग्रेस महासमिति सदस्य हुनुहुन्छ। पदको पछाडि कहिल्यै नलागी राजनीतिक सक्रियतालाई निरन्तरता दिदै आएका ताजपुरिया २०२४ सालमा एक वर्ष जेल पर्नुभएको थियो भने २०२५ देखि २०३३ सालसम्म निर्वासित जीवन बिताउनुभएको छ। उहाँ प्रजातन्त्र र नागरिक अधिकारका लागि भएको हरेक आन्दोलनमा सहभागी रहँदै आउनुभएको छ।

औपचारिक शिक्षा नलिएका ताजपुरिया तीन छोरा एक छोरीका पिता हुनुहुन्छ। समाजसेवामा उहाँको विशेष रुचि छ र व्यक्तिगत रुपमा तथा विभिन्न सामाजिक संघसंस्था मार्फत सामाजिक हितमा सक्रिय रहँदै आउनुभएको छ। सैद्धान्तिक निष्‍ठा र राजनीतिक निरन्तरताले आफूलाई संविधानसभासम्म पुर्‍याएको आकलन गर्ने जगत बहादुर ताजपुरियाले संविधानसभामा दुई मुद्दा विशेष प्राथमिकता साथ उठाउने अठोट गर्नुभएको छ― क. पिछडिएको वर्ग, जातिको राज्यका सबै अंगमा समानुपातिक प्रतिनिधित्वको सुनिश्चितता, ख. राज्यको पुनः संरचना।