नेपाल कम्युनिस्ट पार्टी (माले)

दामोदर चौधरी

नेकपा-मालेका सदस्यका रुपमा २०२३ सालमा राजनीतिमा प्रवेश गरेका ६५ वर्षीय दामोदर चौधरी संविधानसभामा समानुपातिक तर्फका सभासद हुनुहुन्छ। तत्कालीन नेकपा माले एमालेमा परिणत हुँदा उहाँ एमालेमा हुनुहुन्थ्यो भने पार्टी विभाजन भएर नेकपा माले गठन भएपछि त्यसैमा आवद्ध रही आउनुभएको छ। कक्षा पाँचसम्म अध्ययन गरेका नारायणपुर, दाङ निवासी चौधरीका सेतु र मनकली दुई श्रीमती हुनुहुन्छ र उहाँ तीन छोरा तथा चार छोरी सहित सात सन्तानका पिता हुनुहुन्छ। 

नेत्रलाल अभागीबाट प्रेरित भएर राजनीतिमा लागेको बताउने चौधरीले २०३६ चैतदेखि २०३८ पुस सम्म पौने दुई वर्ष जेल जीवन बिताउनुभएको छ। कृषि पेशा सँग आवद्ध सभासद चौधरी समाजसेवा गर्न, नयाँ ठाउँको भ्रमण गर्न र पत्र-पत्रिका पढ्न रुचि राख्नुहुन्छ। आफ्नो इमान्दारीले आफूलाई संविधानसभामा पुर्‍याएको वताउने दामोदर चौधरीले जनता र राष्ट्रको हितमा संविधान बनाउने तथा जनजाति, दलित, पिछडिएकाहरुका समस्या समाधान गर्ने मुद्दालाई प्रमुखतासाथ उठाउने अठोट गर्नुभएको छ।