नेपाल कम्युनिस्ट पार्टी (माले)

जनककुमारी चालिसे

ललितपुर निवासी जनककुमारी चालिसे समानुपातिकतर्फ नेकपा-मालेकी सभासद हुनुहुन्छ। ४८ वर्षीया चालिसेले आफ्नो राजनीतिक यात्रा २०३५ सालमा नेकपा मालेको सदस्यका रुपमा शुरु गर्नुभएको हो। २०२८ सालमा शुरु भएको झापा विद्रोह र आफ्नो पारिवारिक पृष्ठभूमिको प्रेरणाले राजनीतिमा लागेको बताउने चालिसे हाल नेकपा मालेका केन्द्रीय सदस्य र पार्टी सम्बद्ध महिला संगठन (अनेमसंघ) की महासचिव हुनुहुन्छ। पार्टीको राष्ट्रवादी अडान र महिला सशक्तीकरण सम्बन्धी आफ्नो कार्यले आफूलाई संबिधान सभामा पुर्‍याएको उहाँको विश्लेषण छ। उहाँ महिला सशक्तीकरण सम्बन्धी विभिन्न संस्थामा आबद्ध हुनुहुन्छ।

त्रिभुवन विश्वविद्यालयबाट समाजशास्त्रमा स्नातक तहसम्म अध्ययन गरेकी चालिसे दुई छोराकी आमा हुनुहुन्छ। साहित्यकार श्यामप्रसाद शर्माका दर्जनौं पुस्तक उहाँले प्रकाशित गर्नुभएको छ र अनेमसंघको मुखपत्र "महिला मार्ग"को पनि प्रकाशन गर्दै आउनुभएको छ। नयाँ ठाँउमा घुम्ने र समाजसेवा गर्ने काममा उहाँको रुचि छ। संविधानसभामा राष्ट्रियताको संरक्षण र महिला हक-अधिकारका मुद्दालाई प्राथमिकता साथ उठाउने उहाँको संकल्प छ। उहाँ भन्नुहुन्छ- "यतिखेर मुलुक सामन्तवादको चङ्गुलबाट त मुक्त भएको छ तर विस्तारबादी र साम्राज्यवादीको चङ्गुलमा नपरोस् भनेर सबैले सचेत रहनुपर्छ।"