नेकपा एमाले

विनोद कुमार चौधरी

नेपाल उद्योग परिसंघका अध्यक्ष विनोद कुमार चौधरी समानुपतिकतर्फ नेकपा-एमालेका सभासद हुनुहुन्छ। मुलुकको प्रसिद्ध औद्योगिक घराना चौधरी ग्रुपका प्रेसिडेन्ट सभासद चौधरीले पारिवारिक विरासतका रुपमा व्यापार-व्यवसाय र विभिन्न उद्योगहरु सञ्चालन गर्दै आउनुभएको छ जसका कतिपय उत्पादनहरुले विदेशमा समेत लोकप्रियता आर्जन गरेका छन्। काठमाडौं, रविभवनमा जन्मी त्यहीं बसोबास गर्नुभएका चौधरी नेपाल उद्योग वाणिज्य महासंघसँग समेत आवद्ध हुनुहुन्छ। राजनीतिमा कहिल्यै सक्रिय नरहेका चौधरीले हालसम्म नेकपा एमालेको सदस्यता लिनुभएको छैन।

विनोद कुमार चौधरीले त्रिभुवन विश्वविद्यालयबाट वाणिज्यशास्त्र र जनप्रशासनमा स्नातक तहसम्मको अध्ययन गर्नुभएको छ। तीन छोराका पिता चौधरीको रुचि समाजसेवामा छ र उहाँले सामाजिक कल्याणका विभिन्न कार्य गर्दै आउनुभएको छ। अर्थतन्त्रको विकासलाई देशविकासको मेरुदण्ड मान्ने चौधरी देशको खस्कँदो उद्योग व्यापारको लागि उपयुक्त र त्यसको स्तर वृद्धि गर्ने खालको संविधान बनाउन आफ्ना प्रयास केन्द्रित गर्ने बताउनुहुन्छ।