नेकपा एमाले

जया घिमिरे 

सिरहा, विष्णुपुरपट्टी निवासी जया घिमिरे समानुपातिकतर्फ नेकपा-एमालेका सभासद हुनुहुन्छ। विद्यार्थी राजनीति मार्फत २०२९ सालबाट राजनीतिक यात्रा शुरु गरेकी सभासद घिमिरेले यस क्रममा २०३२ देखि दुई वर्ष भूमिगत जीवन र २०३४ साल देखि राजकाज मुद्दामा साढे दुई वर्ष जेल जीवन बिताइसक्नुभएको छ। दुःखी, पीडित, शोषित र अवसरबाट वञ्चित जनताको उत्थानका लागि आफू राजनीतिमा होमिएको बताउने घिमिरे अखिल नेपाल महिला संघकी संस्थापक केन्द्रीय सदस्य हुनुहुन्छ। हाल उहाँले एमाले केन्द्रीय सहकारी विभाग सदस्य तथा अखिल नेपाल महिला संघ केन्द्रीय सचिवको जिम्मेदारी वहन गर्नुभएको छ। एमाले सगरमाथा अञ्चल कमिटी सदस्य रहिसकेकी घिमिरे २०५६ सालको संसदीय निर्वाचनमा सिरहा क्षेत्र नं.३ बाट उम्मेदवार हुनुहुन्थ्यो।

त्रिभुवन विश्वविद्यालयबाट राजनीतिशास्त्रमा स्नातक ५२ वर्षीय घिमिरे दुई छोरा, एक छोरीकी आमा हुनुहुन्छ। अध्ययन तथा समाजसेवामा उहाँको विशेष रुचि छ र महिला हित समाज नामक संस्था मार्फत महिला हितका कार्यमा संलग्न हुनुहुन्छ। सैद्धान्तिक आस्था, राजनीतिक निरन्तरता र लगनशीलताले आफूलाई संविधानसभासम्म पुर्‍याएको आकलन गर्ने सभासद जया घिमिरेले संविधानसभामा महिला हिंसा विरुद्ध र सहकारी क्षेत्रमा व्यापक सुधारका निम्ति आवाज उठाउने संकल्प गर्नुभएको छ।