नेकपा एमाले

नारायणी देवी घिमिरे अर्याल

तानसेन नगरपालिकामा स्थायी बसोबास भएकी नारायणीदेवी घिमिरे अर्याल समानुपातिक तर्फ नेकपा-एमालेका सभासद हुनुहुन्छ। त्रिभुवन विश्वविद्यालयवाट कानूनमा स्नातक र व्यवस्थापनमा स्नातकोत्तर गरेकी ४३ वर्षीया अर्याल राजनीति बाहेक वकालत पेशामा समेत अवद्ध रहँदै आउनुभएको छ। समाजसेवामा रुचि राख्‍ने अर्याल दुई छोरीकी आमा हुनुहुन्छ। आफ्नो पार्टी बाहेक कुनै पनि संघ संस्था सँग आवद्ध नरहेकी अर्यालका लेख-रचना विभिन्न पत्र-पत्रिकामा प्रकाशित हुँदै आएका छन्।

पारिवारिक वातावरणका कारण विद्यार्थी अवस्थादेखि नै राजनीतिमा क्रियाशील अर्याल अखिल नेपाल महिला संघको राष्ट्रिय परिषद सदस्य र सोही संघको पाल्पा जिल्ला संयोजक रहिसक्नुभएको छ। साथै उहाँले त्रि.वि. सेवामा २२ वर्षसम्म अधिकृत स्तरमा रही काम गर्नुभएको छ। सभासद अर्याल हाल एमालेको जिल्ला कमिटी सदस्य तथा महिला बुद्धिजीवी फाँट इन्चार्ज हुनुहुन्छ। राजनीतिक संघर्षका क्रममा पटक-पटक पक्राउ परी हिरासतको यात्रा गर्नुभएको छ। लामो राजनीतिक यात्रा, सैद्धान्तिक निष्ठा र पार्टीमा गरेको योगदानले आफूलाई संविधानसभा सभासद बन्न मद्दत पुर्‍याएको मान्ने नारायणीदेवी घिमिरे अर्यालले संविधानसभामा गएर प्रमुखतासाथ उठाउन चाहेका दुई मुद्दा हुन्- क. महिलालाई सकेसम्म बढी अधिकार सम्पन्न बनाउने, ख.लोकतान्त्रिक गणतन्त्रलाई संस्थागत गर्ने।