मधेशी जनअधिकार फोरम, नेपाल

ललिता देवी साह

सुनसरी, चिम्दी निवासी ३० वर्षीया ललिता साह समानुपातिकतर्फ मधेसी जनअधिकार फोरमका सभासद हुनुहुन्छ। एसएलसी सम्मको अध्ययन गरेकी साह २०६३ सालबाट फोरममा क्रियाशील हुनुहुन्छ। त्यसअघि उहाँ कांग्रेस कार्यकर्ताका रुपमा जिल्लामा सक्रिय हुनुहुन्थ्यो। फोरमको युवा शाखा काठमाडौं शाखाका इन्चार्ज उहाँका श्रीमान् जीतेन्द्रप्रसाद साह २०६३ सालमा कोटेश्‍वरबाट अपहरणमा पर्नुभएको थियो। उहाँ अहिलेसम्म फेला पर्नुभएको छैन, न त कसले अपहरण गरेको हो भन्ने नै पत्ता लागेको छ। सभासद साह भन्नुहुन्छ - "श्रीमान् अपहरणमा परेपछि पार्टीले मलाई सभासदमा ल्याएको हो।" 

एसएलसी सम्मको अध्ययन गरेकी सभासद साहका एक छोरी, दुई छोरा छन्। उहाँले किराना पसल र औषधी पसल सञ्चालन गर्दै आउनुभएको छ। समाजसेवामा उहाँको रुचि छ र व्यक्तिगत तथा सामाजिक संघसंस्था मार्फत समाज हितका कार्यमा संलग्न रही आउनुभएको छ। संविधानसभामा मधेसी जनताको हक-अधिकारका लागि आवाज उठाउने र अपहरणमा परेका आफ्ना श्रीमा‌न्‌को खोजीमा लाग्ने उहाँका मुख्य एजेण्डा हुन्।