मधेशी जनअधिकार फोरम, नेपाल

रामा नन्द मण्डल

मोरङ क्षेत्र नं. ४ बाट निर्वाचित रामानन्द मण्डल मधेसी जनअधिकार फोरमका सभासद हुनुहुन्छ। मधेसी,त्यसमा पनि शोषित-पीडित जनतालाई राज्यको मूलधारमा नल्याएसम्म देशले सच्चा प्रगति गर्न नसक्ने धारणा राख्‍ने मण्डल २०६३ माघदेखि फोरममा सक्रिय हुनुहुन्छ। मधेसी जनतालाई मुक्ति दिलाउन राजनीतिमा लागेको बताउने मण्डल हाल फोरमका क्षेत्रीय संयोजक हुनुहुन्छ। यसअघि उहाँले एमालेमा संगठित सदस्य भएर काम गर्नुभएको थियो। जनतासँगको निकट सम्बन्ध र सामाजिक क्षेत्रमा गरेको कामबाट प्रभावित भएर जनताले आफूलाई संविधानसभामा जिताएको उहाँको आकलन छ। 

त्रिभुवन विश्वविद्यालयबाट वाणिज्यशास्त्रमा स्नातक मण्डलले १२ वर्षसम्म स्थानीय शिवशक्ति मा.वि. मा अध्यापन गर्नुभएको छ। उहाँ उक्त मा.वि.का अध्यक्ष समेत रहँदै आउनुभएको छ। अध्ययन र समाजसेवा उहाँको रुचिका क्षेत्र हुन्। व्यक्तिगत तवरमा र सामाजिक संघसंस्था मार्फत उहाँ सामाजिक कार्यमा सक्रिय रहँदै आउनुभएको छ। सभासद रामानन्द मण्डलले संविधानसभामा प्रमुखतासाथ उठाउन चाहेका प्रमुख दुई मुद्दा हुन् - क. शोषित पिडित जनतालाई सबै खालका शोषण र पीडाबाट मुक्ति दिलाउने, ख. मधेसी जनतालाई राज्यको मूलधारमा ल्याउने।