मधेशी जनअधिकार फोरम, नेपाल

सन्ध्या देवी देव

बाँके, एकलैनी बजार निवासी ३८ वर्षीया सन्ध्या देवी(देव) समानुपातिकतर्फ मधेसी जनअधिकार फोरमका सभासद हुनुहुन्छ। २०४६ सालबाट नेपाली कांग्रेस मार्फत राजनीति प्रारम्भ गरेकी देव केही वर्ष पछि समता पार्टीमा सक्रिय हुनुभयो र २०६२ सालदेखि फोरममा क्रियाशील हुनुहुन्छ। राजनीतिक यात्राका क्रममा उहाँ बेलाबखत पक्राउ परी हिरासतमा रहनुभएको छ। कांग्रेसमा छँदा महिला ट्रेड युनियन कांग्रेस बाँके जिल्ला अध्यक्ष रहेकी देव हाल मधेसी महिला फोरमका केन्द्रीय अध्यक्ष तथा मधेसी जनअधिकार फोरमका केन्द्रीय सदस्य हुनुहुन्छ। 

भारतबाट आई.ए. सम्मको अध्ययन गरेकी देव ६ छोरीकी आमा हुनुहुन्छ। समाजसेवामा उहाँको विशेष रुचि छ। उहाँ समाज विकास केन्द्र नामक संस्था खोलेर सामाजिक कार्यमा लाग्दालाग्दै राजनीतिमा प्रवेश गर्नुभएको हो। सामाजिक सक्रियता र जनतासँगको निकटताले आफूलाई संविधानसभामा पुर्‍याएको बताउने सभासद देव संविधानसभामा गएर आफूले गर्ने प्रमुख दुई कामलाई यसरी निर्धारण गर्नुहुन्छ- क. मधेसी जनताको हक-हितका लागि लड्ने, ख. पिछडिएको वर्ग, जात, जातिलाई राज्यको सबै अंगमा समान प्रतिनिधित्वको लागि पहल गर्ने ।