स्वतन्त्र

बबन सिंह

रौतहत, क्षेत्र नं. १ बाट स्वतन्त्र उम्मेद्वारका रुपमा निर्वाचित सभासद बबन सिंहले भूमिगत अबस्थामै उम्मेद्वारी दिएर विजय हासिल गर्नुभएको हो। काठमाडौंमा भएको बम कान्डमा आफूलाई राजनीतिक रुपमा फसाइएकोले भारतमा गई भूमिगत हुनुपरेको र त्यही अवस्थामा चुनाब लडेको उहाँ बताउनुहुन्छ। जनतासँगको आत्मीय संबन्ध र इमान्दारीले आफूलाई निर्वाचनमा विजयी गराएको उहाँको आकलन छ। ३१ वर्षीय सिंह अविवाहित हुनुहुन्छ र उहाँले भारतबाट आइ.ए. सम्मको अध्ययन गर्नुभएको छ। उहाँको पेशा ठेक्का पट्टा हो र राजनीति विशेष रुचिको क्षेत्र हो।

बबन सिंह २०४० देखि २०६३ साल सम्म नेपाली कांग्रेसमा र २०६३ को मधेश आन्दोलन देखि मधेशी जन अधिकार फोरममा सक्रिय हुनुहुन्थ्यो। भन्नुहुन्छ- तर कांग्रेस र फोरममा लागेर केही नहुने, केही गर्न नसकिने देखेपछि स्बतन्त्र रुपमा राजनीति शुरु गरेको हुँ। नियम कानून सबैलाई बराबर लाग्नुपर्छ, कसैलाई लाग्ने - कसैलाई नलाग्ने हुनुहुँदैन भन्ने आग्रह राख्‍ने सिंह संविधानसभामा राज्यको पुनः संरचना र सबैलाई समान अधिकारको मुद्दालाई प्रमुखतासाथ उठाउने बताउनुहुन्छ।