नेपाली जनता दल

गायत्री साह

नेपालगंज, अर्नाहामा जन्म भई सर्लाहीमा बसोबास गर्ने गायत्री साह समानुपातिक तर्फ नेपाली जनता दलका सभासद हुनुहुन्छ। २५ वर्षीया साहको मातृभाषा बज्जिका हो र उहाँले त्रिभुवन विश्वविद्यालयबाट राजनीतिशास्त्रमा स्नातक तहसम्मको अध्ययन गर्नुभएको छ। दलित र पिछडिएकाहरुलाई समाजमा गरिने शोषण र अपमान तथा आफूलाई दिइएको सामाजिक यातनाबाट राजनीतिमा लाग्न प्रेरित भएको बताउने साह २०५६ सालदेखि राजनीतिमा हुनुहुन्छ। उहाँ नेपाली जनता दलका केन्द्रीय सह-सचिव हुनुहुन्छ। 

सामाजिक कार्यमा विशेष रुचि राख्‍ने सभासद गायत्री साह नेपाल नारी संगम उत्थान केन्द्र, सुडी युथ समाज र जय जनता ट्रेनिङ वेलफेयर काउन्सिल लगायतका संघसंस्था सँग आवद्ध हुनुहुन्छ। परिवारको सहयोग र समर्थनबाट नै आफू संविधानसभा सम्म पुग्न सफल भएको बताउने साह देशलाई अघि बढाउन शिक्षामा जोड दिनुपर्नेमा विश्‍वस्त हुनुहुन्छ। संविधानसभामा उहाँले उठाउने अठोट गरेका प्रमुख मुद्दा हुन्― क. दलित, अल्पसंख्यक, मुस्लिम, महिला, आदिवासी तथा पिछडिएका वर्गको उत्थान, ख. राज्यका सबै अंगमा महिलालाई ५० प्रतिशत स्थान सुरक्षित गर्ने व्यवस्था।