समाजवादी प्रजातान्त्रिक पार्टी, नेपाल

प्रेम बाहादुर सिंह

कालिकोट, ओदानकुका ५६ वर्षीय प्रेम बहादुर सिंह समानुपातिकतर्फ समाजवादी प्रजातान्त्रिक जनता पार्टी― नेपालका सभासद हुनुहुन्छ। दुई श्रीमती ज्ञानकुमारी सिंह र पद्मा सिंहका पति सभासद सिंह तीन छोरीका पिता हुनुहुन्छ। २०२९ सालबाट राजनीतिमा सक्रिय सिंह हाल आफ्नो पार्टीको अध्यक्षमण्डलका अध्यक्ष हुनुहुन्छ। शुरुदेखि वामपन्थी राजनीतिमा संलग्न रहेका उहाँ राजनीतिक संघर्षका क्रममा विभिन्न समयमा गरी कुल डेढ वर्ष जेल परिसक्नुभएको छ। २०५६ को संसदीय निर्वाचनमा एमाले उम्मेदवारका रुपमा कालिकोट क्षेत्र नं. १ बाट निर्वाचित सिंह त्यसअघि एमालेका तर्फबाट राष्ट्रिय सभा सदस्य, सचेतक र कानून तथा न्याय मन्त्री रहिसक्नुभएको छ। २०४८ को संसदीय निर्वाचनमा पनि उहाँ उम्मेदवार हुनुहुन्थ्यो। २०६१ सालमा एमालेबाट राजिनामा गरी उहाँले आफ्नो बेग्लै पार्टी खोल्नुभएको हो। पुनर्स्थापित संसदमा रहे पनि उहाँलाई अन्तरिम संसदमा एमालेले मनोनीत गरेन।

आई.एस्सी. सम्म अध्ययन गरेका सिंह समाजसेवामा रुचि राख्‍नुहुन्छ र उहाँले जनतारा साहित्यिक पत्रिका प्रकाशित गर्दै आउनुभएको छ। उहाँले संविधानसभामा संघीयताको खाका र समावेशी व्यवस्थाका मुद्दाहरु प्रमुखतासाथ उठाउने अठोट गर्नुभएको छ।