नेपाल कम्युनिस्ट पार्टी (एकिकृत)

चन्द्र देव जोशी

नेकपा संयुक्तका केन्द्रीय अध्यक्ष चन्द्रदेव जोशी संविधानसभामा समानुपातिक तर्फका  सभासद हुनुहुन्छ। ७० वर्षीय जोशी पाँच दशक अघि अर्थात् २०१४ सालदेखि राजनीतिमा निरन्तर क्रियाशील रहँदै आउनुभएको छ। जनमैत्री विश्वविद्यालय, मस्को (रुस) बाट मेकानिकल इंजिनीयरिङमा स्नातकोत्तर जोशी तीन छोराका पिता हुनुहुन्छ। दार्चुला जिल्ला, शंकरपुर बस्तीमा जन्मनुभएका उहाँ काठमाडौंमा बसोबास गर्नुहुन्छ। अध्ययन, अध्यापन, लेखन तथा सामाजिक कार्यमा उहाँको विशेष रुचि छ र राजनीति बाहेक इंजिनीयरिङ उहाँको पेशा हो।  

गाउँमा विद्यमान गरीबी, विभेद तथा थिचोमिचोका कारण विरोधको भावना जागृत भएर राजनीतिमा सक्रिय भएका जोशी २०१४ सालमा नेपाली कांग्रेसमा हुनुहुन्थ्यो। त्यसपछि तत्कालीन नेपाल कम्युनिस्ट पार्टीमा क्रियाशील रहँदै पछिल्लो समयमा नेकपा-प्रजातन्त्रवादी सँग सम्बद्ध रहनुभयो जसले हाल नेकपा संयुक्तको नाम लिएको छ। सोही पार्टीको तर्फबाट २०४८ सालमा उहाँ प्रतिनिधिसभाका उम्मेदवार हुनुहुन्थ्यो। २०४२ सालको बमकाण्डमा आरोपित भएर जोशीले पुलिस खोरमा ११ महिना बन्दी जीवन बिताउनुभएको थियो। 

आफ्नो स्थिर राजनीतिक अडान, वैचारिक स्पष्टता र व्यापक जनसम्पर्कले संविधानसभामा पुर्‍याएको ठान्ने जोशीले पार्टीभित्र खास गरी वैचारिक विभाग र पार्टी शिक्षाको जिम्मेदारी सम्हाल्दै आउनुभएको छ। अखण्ड नेपालभित्र संघीय संरचना तथा सबैको पहुँच र सहभागिता हुने गरी समावेशीकरणको सुनिश्चितता उहाँले संविधानसभामा प्रमुखतासाथ उठाउने अठोट गरेका दुई मुद्दा हुन्। देशको अखण्डता, स्वाभिमान, स्वतन्त्रता र सार्वभौमिकताको रक्षा गर्दै सबैको साझा नेपाल बनाउने अभियानमा लाग्न उहाँ सबैलाई आग्रह गर्नुहुन्छ।