पार्टीका रूपमा दर्ता हुनुअघि चुरे भावर राष्ट्रिय एकता पार्टी नेपाल चुरे भावर राष्ट्रिय एकता समाजका रूपमा थियो। यो समाज पहाड र हिमाली भेगबाट तराई आई बसोबास गरेका पहाडियाहरूमाथि मधेसी सशस्त्र समूहहरूले आक्रमण गर्न थालेपछि गठन गरिएको थियो। तराईमा बसोबास गर्ने पहाडी मूलका जनताको बचाउका लागि अस्तित्वमा आएको यस पार्टीले चुरे भावर क्षेत्रको स्वायत्तता माग गरेको छ।

यो पार्टी र सरकारबीच वि स २०६४ पुसमा नौ बुँदे सहमतिमा हस्ताक्षर गरिएको थियो र त्यसपछि यसले निर्वाचनमा भाग लिने निर्णय गरेको थियो।

यस पार्टीको कार्यकारी समितिमा अध्यक्ष केशव मैनालीका अतिरिक्त उपाध्यक्ष, महासचिव, सहसचिव, कोषाध्यक्ष र एक जना प्रवक्ता रहेका छन्। पार्टीको केन्द्रीय समितिमा ६४ जना सदस्य रहेका छन्। यस पार्टीले राजतन्त्रको भाग्य जनमत सङ्ग्रहद्वारा निर्धारण गरिनुपर्ने माग गरेको थियो। यसैगरी, नेपाल धर्म निरपेक्ष राष्ट्र हुने वा हिन्दू राज्य रहने भन्ने बारे पनि सोही प्रक्रियाबाट तय गरिनुपर्ने धारणा राख्दछ।

यस पार्टीले जातीय आधारमा होइन भौगोलिक र स्रोतको वितरणका आधारमा सङ्घीय एकाइहरूको विभाजन गरिनुपर्ने मान्यता राखेको छ। यस पार्टीले संविधानसभा निर्वाचनमा एक सिट जितेको छ।